明報 | Link

加密貨幣逐漸走入大眾視野,Pricerite(實惠)噚日宣布,接受顧客以比特幣(BTC)、以太幣(ETH)或萊特幣(LTC)三種數字貨幣付款,並以即時港幣匯率結帳,未來亦會接受更多流通量高嘅大型數字貨幣。

以即時港幣匯率結帳

實惠今次伙拍時富金融服務集團旗下鯰魚金融科技、聚合支付平台錢方QFPay合作,鯰魚金融科技提供數字貨幣結算服務,錢方QFPay就負責付款處理技術同提供其他電子錢包嘅支付功能。事實上,實惠同時富金融嘅母公司,都係關百豪旗下嘅時富投資(1049)。實惠就話,如果客戶想用數字貨幣付款,首先喺流動POS機(銷售點終端)輸入商品嘅港幣價格,選擇以數字貨幣付款之後,流動POS機就會出現對應嘅數字貨幣匯率同其二維碼,客戶再用數字貨幣錢包掃描二維碼,輸入錢包密碼後,就可以完成支付。